And he said to them, “Is a lamp brought in to be put under a bushel, or under a bed, and not on a stand? For there is nothing hid, except to be made manifest; nor is anything secret, except to come to light. If any man has ears to hear, let him hear.” And he said to them, “Take heed what you hear; the measure you give will be the measure you get, and still more will be given you. For to him who has will more be given; and from him who has not, even what he has will be taken away.”

—————————–

An kadan’ag o kapawa sanan suga na taghisgutan dinhi sa Ebanghelyo kuman amo’y maghatag nan meaning na gusto ipahimo ni God sa ato tanan.

Kamatuoran sanan karajawan ni God an buot isapasabot nan kadan’ag sanan paggiya o jaon tag-laong sa tagalog na paggabay ‘sab an buot ipasabot nan lamparahan o suga na kon sa ato pa, petromax.

An kamatuoran dili kinahanglan na itago kay aber kon uno na butang sa kalibutan – himoon, isulti sanan huna-huna’on, nahibayo an ato Diyos nan tanan.

Ugsa na kinahanglan, giyahan kita na lamparahan nan ato Ginoo pinaagi sa Ija Espiritu Santo.

Ipangaliya nato kan Lord Jesus na giyahan kita Nija nan Ija kadan’ag sanan pun’on Nija an ato mga kasing-kasing sanan an ato mga huna-huna nan Ija kapawa sanan kamatuoran para mahilajo kita sa mga kasay’anan sanan mga panlinlang ni Satan.

—

———————–

An pinaka-ulihi na tugon ni Jesus sa Ija mga apostoles adeser Sija ibayaw nadto sa langit, na isangyaw nila sa tanan kalibutan an marajaw na balita nan kaluwasan.

Ipangaliya nato kan Jesus, pinaagi sa Holy Spirit, na pun-on kita Nija nan kalipay na makapadayag nan ato pasalamat sanan pagdajeg kan God para sa Ija kahimayaan.

—

And his mother and his brothers came; and standing outside they sent to him and called him. And a crowd was sitting about him; and they said to him, “Your mother and your brothers are outside, asking for you.” And he replied, “Who are my mother and my brothers?” And looking around on those who sat about him, he said, “Here are my mother and my brothers! Whoever does the will of God is my brother, and sister, and mother.”

————————

Segurado kita na mahal nato ang ato pamilya sanan an ato mga gintujok, pero uno man kaha na bagan waya ma’y lamang pagpakabana ni Jesus sa Ija mga paryente dinhi sa ato Ebanghelyo?

Dili man tingali kon an tujo ni Jesus na ibale-waya lamang an Ija nanay sanan mga lumon kay an tinood dinhi, mahal man gajud Nija karajaw sila.

Gusto lamang gajud dinhi Nija na ipaabot an leksiyon sa mga namati Dija na kinahanglan an pagnubnob nan tawo sa ija kinabuhi na an mga pulong nan Diyos an importante sanan an pag-akto nan tawo base sa mga gusto nan Diyos.

Ugsa na marajaw gajud seguro na hatagan lamang nato nan luna an Holy Spirit ni God na i-transform an ato mga kasing-kasing, huna-huna, sanan an ato tibook kinabuhi para kita makapakita nan ato libre na paghigugma parehas nan paghigugma nan Diyos dato tanan.

—

Mark 1:40-45

Kon ikaw an makadawat nan milagro gikan sa Ginoo, dili kaha nimo ipamalita, isangyaw sa mga katawhan an imo kalipay na nakadawat ‘kaw nan milagro gikan Dija?

Dinhi, waya gajud makapugong an tawo na maysaki na kitong nan ija tagbati – ija gajud ini tagpahibayo, tanabi, tamalita sa mga katawhan bisan tagpasidan-an daan sija ni Jesus na dili ipanabi an Ija taghimo na milagro dija.

Sa adlaw-adlaw nato na kinabuhi, uno man kaha’y ato bation sanan himoon kon makadawat kita nan milagro?

Kada adlaw, kada oras, kada minuto sanan kada segundo nan ato kinabuhi, milagro na mismo ini gikan Dija, ugsa, kinahanglan mapasalamaton gajud kita karajaw permi sa ato Diyos kay gikan man gajud dija, gasa man an ato kinabuhi nija para dato, mga milagro sa ato kinabuhi adlaw-adlaw.

—

Lk 13:31-35

Sigben an tawag ni Jesus sa kontra Nija na si Herod. Kay uno man kaha? Aktuwali, sigben an ako taghimo na ekuwebalent sa “fox” na diskripsiyon Nija, kay sa Habungan, duro an molaong na jao’y kuno sigben kon duyom na, pero waya’y makadiskraib nan ini.

An sigben kuno an pinakama’aling sanan alisto motago na animal pero arang ka grabe maghasik nan distruksiyon sa bukid sanan mabangis – molukad nan mga tinanum na kamote sanan gabe, mangawat nan nijog, mupatay nan mga hajop sanan man’guba na mga bayatik.

Pero uno ma’y relasyon nan ini sa kinabuhi nato na Kristiyano sanan sa Ebanghelyo mismo?

Sa tan’aw nako, gusto lamang seguro ipakita dinhi ni Jesus na waya’y makapugong nan Ija misyon dinhi sa kalibutan – an pagsalbar nan mga kasay’anan nan mga anak nan Diyos, aber kon uno kabangis nan hari na mopugong Dija.

Amo na kinahanglan, ato ‘sab suklian nan kaligdong an paningkamot ni Christ para dato tanan.

—

Luke 13:22-30

Lord, gamay ra ba an mga tawo na masalbar pag-abot nan panahon? Ini na pangutana an nakahatag nan oportunidad kan Jesus na mahipa-abot sa Ija mga tinun’an na kinahanglan gajud na ipreparar nato an ato mga kaugalingon para andam kita na moatubang sa ato Maghuhukom.

Pero, uno man na mahiot o petsido man kuno, laong pa ni Jesus, an ganghaan patunong didto — na duro an mangalimbasug na makasuyod pero dili nila mahimo kay kuyang an ila kusog.

Amo kay an kinabuhi na Kristohanon, dili man kon madali kay paningkamutan pa man gajud nan tawo na makab’ot nija an Gingharian nan Diyos.

Ugsa na paningkamutan jagud nato na takos kita na moatubang sa ato Maghuhukom pinaagi sa ato pag-preparar nan ato mga kasing-kasing sanan kinabuhi.

—–

Luke 13:18-21

Uno ma’y kalabutan nan gamay na liso kon an hisgutan an kaharian ni God? An isa ka gamay na liso nan mustasa, kon itanom ‘katapos amumahon sanan alimahan pag dajaw, motubo pagdako hangtud na arang na ka aslag, dispuwes moduro an dahon na kasilungan nan mga langgam sanan lingaw sab sila maniba nan mga bunga nan mustasa.

An gamay na liso nan mustasa kon ihambin ‘sab nato sa hinabuhi na Kristohanon, kinahanglan ‘sab nato amumahon sanan areglahon pag dajaw para molambo, sa tabang nan Espuritu Santo, hangtud na mapahasuod kita kan Jesus para mohuya Sija sa ato pagkatawo, sa ato kasing-kasing.

Ipangaliya nato kan God na permi kita Nija giyahan pinaagi nan Espiritu Santo para makahimo kita nan mga butang na gusto Nija para dato.

—

Luke 12:49-53

Kalinaw sa kalibutan? Dili… pagka-bahin-bahin. An hinungdan nan pagkan’hi ni Jesus sa kalibutan para magka-bahin-bahin at mga tawo.

Tinood gajud kay bisan gani sa isa ka komunidad na Kristiyano na ako ‘ingka-matik’dan, nagka-buyag-buyag man gani an mga miyembro nan ini kay molaong man an isa ka paksiyon na gusto ra nila mag-evangelize pero an iban, molaong man sab na gusto nila ipakita an ila hingkat’onan pinaagi sa pagtabang sa mga nanginahang’lan nan tabang.

Buhi karajaw an ato Simbahan, buhi karajaw si Jesus kay Sija man an hinung’dan nan mga diskusyon sanan mga opinion an amo’y maka-aghat dato na mahimo kita na tinood na mga Kristiyano.

—

Luke 12:39-48

Kinahanglan preparado kita permi kada gutlo nan ato kinabuhi.

Kada adlaw, surprisa permi an ato igkahibalag, pero usahay waya raka’y ato pagpakabana kay bagan ordinaryo rakan man lamang an mga panhitabo.

Matam’is an isa ka surprisa kon ato madawat ini na gasa gikan kan God pero waya nato ini paabota. Usahay mangutana pa man gani kita kon uno man na inhatag man ni God inin surprisa na gasa dako. May plano an Diyos kon uno’y ato himoon sa Ija surprisa na gasa para dato – dili kon para sa ato disposisyon ini.

Pero an kinahanglan nato preparahan sa ato mga kinabuhi, an surprisa na pagbalik ni Jesus dinhi sa kalibutan para ipadangat an Ija paghukom sa tanan mga buhi sanan mga patay.

Preparado ba kita na moatubang sa ato Maghuhukom pag’abot nan panahon?

—

Luke 10:1-9

May indibidwal na papel an kada Kristiyano sa pagsangyaw nan mga Word of God. Pero sa ato paghimo nan sugo ni Jesus, tagpasaligan kita Nija na permi Sija kaibanan nato sa paghimo nato nan ato mga buluhaton.

Amo na gusto ‘sab ni Jesus na permi kita iban Dija sa Ija mga panaw. An buot ipasabot dinhi na kinahanglan permanente si Jesus sa ato kasing-kasing pinaagi sa Holy Spirit na amo’y mogiya sa ato mga buluhaton.

God is very good gajud permi kay an tanan pasalig ni Jesus na ihatag Nija an ato mga kinahanglan samtang taghimo nato an ato trabaho para kan God, Ija man gajud tag-prokurar para nato magamit sa ato mga kinabuhi na Kristiyano.

—-